Dita e dyerve të hapura në Shkollën Fillore “Loyola”- Prizren

Shkolla Fillore “Loyola” si çdo vit tjetër edhe këtë vit organizoi festën e shkollës të ashtuquajtur “Dita e dyerve të hapura”.

Kjo festë u mbajt  të premten më 12.10.2018. Hapjen solemne të kësaj dite e bënë nxënësit me përformancat e tyre të mrekullueshme në skenë përmes këngës, baletit, valleve popullore e shumë aktiviteteve të tjera argëtuese.

Pas këtij programi të mrekullueshëm artistik të gjithë të pranishmit, prindërit dhe të ftuarit u shpërndanë nëpër klasa  për të parë aktivitetet e larmishme, të cilat me shumë përkushtim ishin përgatitur nga nxënësit dhe mësimdhënësit e kësaj shkolle.

Shkollën Fillore” Loyola” e frekuentojnë mbi 300 nxënës ku të gjithë ishin të përfshirë në aktivitete të ndryshme nëpër klasa.

Të gjithë prindërit dhe mysafirët dolën të entuziazmuar nga paraqitja e mrekullueshme e nxënësve të kësaj shkolle. Por programi nuk përfundoi këtu.

Për të përmbyllur programin e ditës së shkollës, mësimdhënësit kishin përgatitur një këngë që titullohet  “Dhurata”, të cilën e kënduan veçanërisht për nxënësit e shkollës.

Falënderojmë Zotin për dhuratën e jetës së fëmijëve me të cilët punojmë çdo ditë. Zoti e bekoftë dhe e drejtoftë jetën e secilit prej tyre.