MOTRAT FRANÇESKANE TË ZOJËS SË PAPËRLYER NË MISIONIN KATOLIK KROAT NË GJERMANI – Köln M. BORA MARKU DHE M. RENATA RRAPI

Si çdo vit, në Misionin Kroat – Köln organizohen evente të ndryshme. Më poshtë ju sjellim informacione për aktivitetet më të fundit, veçanërisht në këtë kohë të përgatitjes për lindjen e Jezusit.

Më 23 nëntor, në qytetin e Essenit u mbajt takimi i 24-të i koreve kishtare të fëmijëve dhe të rinjve të misioneve dhe bashkësive katolike kroate në Gjermani. Takimi u organizua nga Zyra Pastorale për Kroatët në Gjermani. Kori ynë i fëmijëve mori pjesë me dy këngë.

Të shtunën, më 30 tetor 2024, u mbajt takimi i lexuesve të misionit tonë, të cilët prej vitesh shpallin rregullisht fjalën e Zotit në kremtimet liturgjike. Në një atmosferë të këndshme, pranë tryezës së përbashkët, lexuesit ndanë përvojat e tyre në shërbim të bashkësisë dhe shprehën nevojën dhe dëshirën për të përsëritur takime të tilla.

Në mënyrë të veçantë u kushtojmë rëndësi kohëve të forta. Kështu ishte edhe këtë vit. Të dielën e parë të Ardhjes, para fillimit të Meshës Shenjte, u bë bekimi i zakonshëm i kurorave të Ardhjes dhe u ndez qiriu i parë i Ardhjes. Riti i ndezjes së qirinjve vazhdon çdo të diel gjatë kohës së Ardhjes.

Meshët e agimit janë gjithashtu të ndjekura mirë. Në mëngjeset e hershme, ende të errëta, vetëm me dritën e qirinjve, besimtarët ringjallin ndjenjën e pritjes për ardhjen e Zotit tonë Jezu Krishtit.

Përveç bekimit të kurorave të Ardhjes, të dielën e parë të Ardhjes, më 1 dhjetor 2024, u pranuan në shërbim 11 ministranta të rinj, djem dhe vajza, të cilët shërbyen rreth altarit së bashku me ministrantat më të mëdhenj. Para fillimit të meshës, ministrantat ndezën qiriun e parë kurse në fund të meshës atyre iu dorëzua nga një dhuratë simbolike në kujtim të kësaj dite të rëndësishme.

 Koncertet e Krishtlindjeve e mishërojnë idenë e Krishtlindjeve sepse i bashkojnë njerëzit në bashkëjetesë dhe bashkëpunim paqësor. Kështu këtë vit, më 5 dhjetor 2024, Arqipeshkvia e Kölnit organizoi për të pestën herë koncertin e Krishtlindjes për koret e bashkësive të gjuhëve të huaja. Koncerti u mbajt në Köln në Kishën e shën Gereonit ku morën pjesë ansamble e kore nga pothuajse të gjitha kontinentet, që veprojnë në arqipeshkvi. Misionin tonë e prezantoi kori i të rriturve me dy këngë Krishtlindjesh.

Më datën 7 dhjetor 2024, një numër i madh besimtarësh (disa qindra), fëmijët dhe prindërit e tyre, u mblodhën në sallën në Bergheim për të mirëpritur shenjtin e tyre të preferuar Shën Nikollën. Pas pandemisë, për herë të parë e festuam sërish në mënyrë madhështore këtë festë. E falënderojmë Hyjin për këtë! Me këtë rast fëmijët dhe të rinjtë i kënaqën të pranishmit me valle, recitime dhe shfaqje, ndërsa shën Nikolla u dhuroi atyre dhurata modeste. Gjatë mbrëmjes performoi edhe kori nga Kroacia “Ivan Filipoviq”. Pas programit e tërë bashkëdia e vazhdoi argëtimin pranë tryezës përplot me ushqime tradicionale nën tingujt e muzikës së grupit “Puls četvorke” (Pulsi i Katërshes).

Të dielën e dytë të Ardhjes, më 8 dhjetor 2024, u bë pranimi i fëmijëve për Krezmim, ndërsa të dielën e tretë, më 15 dhjetor 2024, pranimi i fëmijëve për Kungimin e Parë. Përmes një programi të përgatitur për këtë rast, fëmijët që po përgatiten për sakramentin e Krezmimit dhe të Kungimit të Parë u prezantuan para bashkësisë së misionit në gëzimin të të gjithë të pranishmëve. 

Koha e Ardhjes nuk do të ishte e njëjtë pa këngët e Krishtlindjeve. Në dhjetor të ftohtë, koncertet e Krishtlindjeve ngrohin zemrat dhe ofrojnë momente të këndshme. Prandaj të dielën, më 15 dhjetor 2024 në orën 18:00, në Köln u organizua një mbrëmje shpirtërore dhe muzikore “për kremtimin e Krishtlindjeve”. Me shoqërim muzikor, kori i të rriturve dhe i fëmijëve të misionit shfaqën një program Krishtlindjesh me këngë dhe skenë teatri të lindjes së Krishtit. Programi u pasurua shpirtërisht nga fra Ivan Režić me mendimet e tij për Krishtlindjen.

Shkruan: m. Bora Marku